miércoles, septiembre 04, 2013

La Guita

Perdíu ena hesa montijana, enantis de llegal alos Canchalis, s'escuendi en un secarral una joya arquitetónica, ajena dela mirá delos curiosus, apenas ala vista de cigüeñas i picabueis. Se trata del cortiju dela Guita, obra singulal dentru delos cortijus i casas de lavol delas Vegas Baxas.



Mapa delos caminus que atravessavan la Guita

En subiendu pola carretera delan Nava i en atravessandu la Cabrilla, enantis de llegal alos Canchalis, sal el caminu dela Guita, ata ai pocu particulal i cerrau el passu. Un letreru herrumbrosu ala entrada da fé d'ellu. 

Passandu por olivaris i cerrus de pastu, mos agina el amarillu dun cerru de 244 m que agarva el caminu de piera i tierra.


El cortiju la Guita vistu dendi el sul
Olival
 Al ratu se vein dos edificius ena metá dela ná, arroeaus por olivus empelotinus de fusca. El caminu se vá esborronandu i estrechandu ata que mueri en el cortiju. Antañu estaría en mejoris condicionis i siguiendu-lu llevava derechamenti al cortiju de Casarenti, peru los reguedíus de por baxu i el nuevu destraci de caminus acabarun por echal a perdel los caminus antiguus, sobre tó los dos prencipalis, el caminu Casarenti i el caminu las Tiendas. Esti últimu caminu atravessava las tierras del cortiju i, ahilandu pal norti, desviandu-si alogu pala derecha, llevava alas tierras delas Tiendas, ogañu la presa delos Canchalis.

La Guita dendi ponienti
 Formi se llega, la sensación que da es la de estal de frenti a una obra demasiau linda pa estal ahuera dela vista delos ombris, peru tan rebusta que los sigrus darán cuenta d'ella.
Fachá dela Guita
 El conjuntu está compuestu por dos cortijus, unu de vivienda i otru palas lavoris i el ganau. El cortiju de vivienda sigui el modelu delos cortijus chicus dela zona, de parelis gordas, contrafuertis, pranta baxa i con corral dentru. El edificiu es del tó quairau i se destaca polos laus dela parti sul con parelis piramidalis, sigún s'aprecia ena retrataúra.
Vivienda dela Guita
 Peru lo sobressalienti es el otru edificiu, una villa Caprarola moderna, una obra d'arti arquitetónicu racional i rezia, un castillu de ladrillu i piera, un estandarti ena metá del secarral.
Fachá dela Guita
 Las dimensionis son enormis que Maldonado Escribano (2009, pág. 190) describió como :


Una enorme construcción en la que destaca principalmente su fachada construida en ladrillo utilizando formas geométricas típicas de la arquitectura racionalista de los años 30. Su rotundidad y presencia nos lleva a conectarlo más bien con una explotación de índole industrial más que residencial  agropecuaria.


Puerta de ponienti
 La verdá es que da la sensación de fortaleza que se destaca en un lombinu más dela tierra endulanti que arroea los Canchalis. La fachá impón de frenti, pos es comparanti a una serii de metopas i triglifus giganti. Quatru triglifus con tres pilastras de ladrillu colorau i dos metopas con reondelis al mediu arrendandu torris. Arriba, comu si hueran almenas, peru que assustan más pola su reziúra que pola horma.

Esquina de salienti
 El edificiu se destaca polas hormas, paris, proporcionalis, derechas, comu no son conocías ena naturaleza más que ena cabeça delos ombris. Peru si huera pol colol, naidi diría que aí ai un edificiu: está talmenti escamuflau cona tierra que de largu apenas se distingui. Aquí los materialis lo hazin tó, pos el ladrillu colorau i la mampostería con piera del lugal consiguin arrendan el suelu con precisión.


Detalli dela fachá
Ventana
 Esti tipu de costrucionis son conocías enos puebrus dela zona i vemus en puebrus comu Garrovillas, el Montiju, Esparragaleju, Talavera o la Puebla, edificius más modestus, peru igualmenti hechus con ladrillu vistu i mampostería o tierra. Enque sean costrucionis más o menus modernas, es la continación dela arquitetura delos antiguus, pos ya vemus estus materialis en el molinu de Isidru tamién, entrecalandu otras costrucionis con rollus de Guadiana, comu ena villa romana del Pesqueru o namás parelis de tierra comu en el Condau.


Lau de salienti

Vista sul
 Si se mira al sul se vei alo largu el puebru nuevu de Lácara, Casarenti palos vizinus delas Vegas Baxas, cona morra omónima detrás.

Casarenti cona su morra detrás
 Más alo largu la imponenti sierra de San Serván barruntandu ya la ciá romana de Méria.
Sierra de San Serván
 I si amus dichu que'l cortiju está en un secarral aburríu, quizá es porque no vimus el'agua que corri alos pies. Cequias, charcas i desagüis están debaxu del cortiju, pos es la Guita, el arrayu mesmu del secanu con el reguedíu. 

Charca
 Un cortiju que está de frenti ya cai enos reguedíus, peru se vei un bastu pastizal úmedu, seguramenti antigua charca, peru que no reza enos mapas viejus. 

Umedal
El topónimu dela Guita es pocu vistu paquí: namás tengu recadau esti exempru en Estremaúra, enque quiçá que aigan más. Asseñalu aquí las palabras del mi trebaju a tentu dela toponimia enas Vegas Baxas:



Topónimo simple determinado. La voz guita (< lat. vittam) señala a la cuerda de cáñamo que hasta hace poco era bien empleada en diversas acciones de la vida cotidiana y agraria. Se trata de una finca situada al sur de Los Canchales. Su cortijo es el Cortiju la Guita. Con los regadíos, se ha convertido en tierras bancalizadas al sur.

 Lo emparejamus con nombris d'otrus cortijus comu la Rueda, el Cinchu o la Vara que asseñalan la ralidá del mundu ganaeru, de carretas i achiperris del campu. 

La verdá es que las Vegas Baxas no dexan de susprendel-mus en tolos andaris del ombri i la naturaleza. Caminus i villas romanas, molinus, ermitas, vaus, norias, regatus, canalis, charcas, charcus, puebrus viejus i nuevus. Riqueza i variedá, que namás las milis de ectarias de maís son escapás de echá-lu a perdel, peru essu ya lo dexamus pa otru endilgu...

No hay comentarios: