lunes, septiembre 02, 2013

Fabi, el artesanu

Pareci que ai tiempu que los artesanus localis delos puebrus delas Vegas Baxas se desaparecierun. Ya no quean sillerus o cacharrerus, peru escondiínus enos corralis delas casas o ala puerta dela calli entovía quean angunus artesanus o bordaoras. Ayel tuvi la suerti de conocel a Fabi, el del almacén, empicau a hazel miniaturas delos achiperris tradicionalis delas casas i el campu. 

Fabi delantri dela su muestra
 Fabián Piñero es poblanchinu. Á estau tola vida trebajandu nel campu, enas eras o en el almacén. Labró las uertas que se desparraman ata Guadiana, arremangó carrus de pastu pa agradal la opinión delos señoritus i se passó las oras i las oras montau en trillus: agora ena su cabeça s'arremolinean los recuerdus d'aquella vida pa da-li otra ralidá por mé delas sus manus.
Carru tradicional estremeñu
 Fabi es unu delos pocus poblanchinus que palran cona -u i cona -i, de má que contandu las estorias de quandu críu o mentandu las partis delas pieças que espón, da groria oyé-lu. En el ratinu que anduvimus juntus me estuvu mentandu del carru i las cargas de pastu, dela lavol enas eras del lexíu, el antiguu pozu cona caseta del guarda, las norias delas uertas, las galerías...
Carru conas estacas de Talavera
 Lo más curiosu es ascuchá-lu referil cómu hazi las pieças. Lo más trebajosu, los carrus, está polo craru. Dendi los tendalis ata las compuertas, passandu pol tentimoçu o el promu que está de yanta delas rueas. No le falta detalli. El carru conas estacas de Talavera es delo más lindu dela esposición, pola obra i la estoria de detrás. Estas estacas las hazían en Talavera i servían pa arremangal el pastu ata una altura con buena zimbra sin que se desparramara. Retratus antiguus dan buena cuenta dela zimbra que cogían estus carrus cargaus cona barraca de pastu.
Carreta i carruchu
 No menus curiosus son las carretas con yugu o el carruchu pa una bestia, propius dela genti más baxa andi hazían las lavoris del campu, acarreal agua o lo que huera precisu.
 No faltan tapocu los achiperris pa enganchal las bestias, comu los cangallus, el horcati, las cangas o los yugus.
 Dos trillus de ruea i con assientu están ena esposición arreglu alos que avían antiguamenti enas eras. Fabi se recuerda dela cansina tarea de dal vueltas sentaus en ellus, antis de tenel assientu, en sacus con bálagu.
Noria poblanchina
Se destaca la noria, hecha arreglu ala delas antiguas uertas poblanchinas. No faltan ni los caxillonis, la panera o l'almijarra o la bestia con el horcati a dal vueltas pol andil. Delas norias poblanchinas ya palremus en otrus endilgus i diximus el estau en el que están, la delos Hoyancus, las dela Cabrilla o la dela uerta junta el Caliente.
Rastrillus delas eras, delas grancias, carrucha delos artolanus, hocinu, media quartilla



Cautivador
 Tien una coleción d'araus (romanu, rastrillu de yunta, máquina de cincu rejaillas o cautivadol) con tolos detallis, mesmu si son giratorius. Nombris que apeninas los más viejus sabin mentá-lus porque passarun muchas oras tras ellus labrandu la tierra de vega.
Detrás rulu, artesa i escalera, delantri, paneru de lavandera
 Achiperris delas casas tien a hinchaol: escaleras, artesas, panerus, chinerus, bancas, assientus, mesas, cantareras, morteru con su macha, barrilis i tinajas, ata un especieru!

Coleción de muebris dela casa

Especieru

Cantarera i pozu
Muchu llovió dendi que Fabián prencipiara de regaol alos 12 añus, peru essa vida llena de padeceris i briegas tien enas sus palabras i ena obra delas sus manus un craru refrexu. Enque la vida enos puebrus delas Vegas Baxas parecía tenel su bondá polo ricu dela tierra, siempri hue compricá, pola mala salubridá del ambienti i los puebrus. Fabi se recordava de quandu echarun las callis, porque lo que avía endenantis era la regaera ala mitá pondi corrían tolos orinis, delos barrizalis i terremotus delas callejas. Con tó i con essu, quean ena memoria delos viejus la estoria dela Puebla que ata ai pocu era quasi que siempri igual, embaxu dela mirá atenta delos señoritus, sirviendu pa palacius i casas grandis, viviendu ena media capa algún que otru labraol i debaxu el puebru corrienti. Estu, aparentimenti, muó, peru enos últimus añus estamus a vé-lu otra ves i convién no cogel-mus desapreveníus, porque la estoria que Fabi talla conas sus manus hue la que él vivió i puei que mos sirva pa echal-mus la idea del versu que se repiti siempri entre los ombris: la estoria.

No hay comentarios: