domingo, junio 16, 2013

El molinu que Guadiana çamargulló

Ya passarun unus mesis dendi que Guadiana, dispués que se saliera dela caxa, embuyera con la torrenti d'agua senaras, casas aislás i sí, tamién molinus. 

Ayel tardi m'acerqueá a vel las conseqüencias dela riá sobre'l molinu d'Isidru. Cuya suspresa estuvu quandu vidi aquellu conas çarças encamás, los acessus aborraus i impossibli de arroeal...


Molinu dendi el muru dela barranca
 Por causa dela riá, agora las çarças dexan vel el molinu alo largu dendi la barranca d'entrada. Peru sigún mos acercamus vemus que las çarças, los andarríus i las taramas están por tós laus esparramás, borrandu las vereas limpiás.
Entrada'l molinu atrabancá pola fusca

Escalahansus
 Mesmu los escalahansus desenterraus agora están embaxu del barru ressecu i las çarças...
Interiol del molinu
 Por drentu el espetu es alamentabli. Un arvu cortau i caíu contra el muru de ponienti enllena la primel parti dela navi. Renuevus de çarças i potroneras están, a pocu a pocu, comiendu-si la puerta.
Muela inculta pola fusca
 Las muelas estás incultas, tantu la volandera comu la baxera.
Muru
 Poemus da-li gracias que el muru que destraça i contien la barranca agora es visibli, al cael-si tola fusca pala orilla.
Sillareju
 Mesmu puein vel-si algunas pieras labrás mediu enterrás entre las ojas delos ucalitus.
Entrada'l molinu
 El acessu polas compuertas está incultu polas taramas, las çarças i los cachus de ucalitus atravessaus...
Frol dela aldefa
I ena verea d'abaxá, tamién inculta pola fusca, vemus además delos cardus, una aldefa en frol, que enque sean tóssicas, era lo únicu agradabli de vel en el molinu.

No hay comentarios: