sábado, marzo 30, 2013

Los andilis del agua: Guadiana arrecupera la su caxa

Namás passa los añus que lluevi muchu i siendu Estremaúra, es algu que passa de higu a breva. Cona suelta del'agua delas presas esta semana i la retolá que á cogíu delas riveras, la dama Guadiana arrecupera la su horma, antis afiná, disformi, changurria, ora frondosa. Subi polos cauzes hozaus antañu, aborra las orillas artificialis, arrasa conos hoyancus delas graveras. Las riveras, regatus i charcus corrin, fusionandu-si enantis de tiempu con Guadiana.

Orilla del Puente Roto
 Dendi'l Puente Roto ata la Barca, Guadiana corri embarrau, travandu andarríus entre las raízis delos ucalitus.
El Correntón
 El correntón que abri charcus ora poemus vel el su cussu natural, renti al muru.
El Muro
 Los fresnus i los almendrus verdean sobre las aguas craras del charcu, que de no sel pol muru, atraviessa delos bancalis i delas graveras d'arriba ata'l Correntón.
Boca del Antrín
Boca del correntón dela Branca
 El Antrín gomita el'agua envarbascá en Guadiana i sona comu ai añus que no sonava. Algún silgueru i algunas rabúas querivan acompañal el rompel delas aguas. Más alantri, el correntón dela Branca, se hazi con el su cussu en ringu-rangus pola alamea d'ucalitus i las hoyancas delas graveras, peru cortu el cauzi: más arriba los caminus i las obras modernas tienen estruíu el passu.
Froris del peral
 Mentris, ena Isla Baldía, los peralis aprovechandu que oi hazía sol abrin las sus froris pa deleiti de abejas i delos que, sin mieu al barru i ala fusca, son osaus de vé-lus enos bancalis ahitus de rollus.
 
Allá, ena Barca, paragi bien cercanu a Guaxira, el ríu s'enancha aborrandu islas, caminus, vereas i mesmu el propiu embarcaeru.
De frenti, el embarcaeru guaxireñu
De frenti se vei el embarcaeru ermanu guaxireñu, sina rampla, alagandu el'agua la parti d'atrás, llegandu el agua seguramenti ata el propiu cortiju.
La casilla tien mediu metru d'agua: es impossibli vel los tubus que se çamargullin en Guadiana, porque ella se los comió con hambri canina.
Verea'l molino d'Isidro
Tamién Guadiana s'está comiendu, comu enos tiempus de patrás, el molinu d'Isidru. No se poía ajorral ata'l molinu, pos el'agua ataruga la verea de baxá, ya de por sí inculta entre imponentis xaramagus.

Guadina corri i embulli. Delas parcelas mana el'agua. Las riveras i regatus se sonriyin enllenus de vida. Es capás de echal-si unu una idea de quális eran los andilis del'agua antañu por estas tierras tan muás quandu Guadiana comi.


No hay comentarios: