martes, marzo 05, 2013

Adornus froralis 2013

Esti añu Val-dela-Calçá s'emperifolla comu dama que espera los primerus rayinus de sol dela primavera. Las callis s'enllenan de froris rosas i brancas que se destiendin por farolas, ventanas, balconis i huentis. No güelin: pa essu es precisu salil al campu, peru enllenan el sentíu dela vista dobrimenti, pol grandol i lindeza.

 El puebru, en viniendu pol norti, dendi Guadiana, acibi al vesitanti con estas letras artesanas de rosa.
 Ena praça, un otru añu más las alfombras brancas i rosas adornan el ayuntamientu i cientus de froris están recolgandu delos arvus.

 En buscandu la calli la Luna, esti golpi es un verdaeru prazel pala vista vel las casas brancas adornás con tiestus i arvus tupíus de froris rosas. No ai banderolas que asseñalin nación nenguna, sino froris, la bandera dela naturaleza.
 Puertas, ventanas, rejas, huentis i parelis luzin vistosamenti los coloris dela primavera en Val-dela-Calçá.




 Alogu, pol puebru, alfombras multicoloris, grandis floriponis i recolguinis ressaltantis vistin las casas.
 Ena calli ntra. señá delos Remedios la cigüeña s'aperdija de ramus pa hazel el ñíu que reposa ena palmera al cabu la calli. Los vezinus echarun largas oras apreparandu los cientus i cientus de froris, cuerdas i ramus que adornan las callis, unus pol barrius, otrus por casa, ena idea de que por estus días los pobremas son más chicus quandu los valviensis mos embaímus en esperandu la primavera assina.

 Mentris que ena ronda'l Saliente las casas, renti al abrevaeru, guiñan las sus froris al vesitanti embaxu el relumbrón naranjas delos arvus delos enceraus.

Otras callis, comu las Dalias, destiendi hermosus ramus con froris recortás, mariposas i abejas que zumbean junta la colmena.

Tol que quiera vé-lu está a tiempu: estas son puestas delos ombris i son quien decidin quántu tiempu están. Las que están enos campus tienin sus días, peru mal apenas án abiertu pola assencia de sol entovía. La lluvia está mermandu las froris i desojandu, peru entovía se puein vel con groria ectarias de frutalis i almendrus esparramaus pandiquiera. Estai-vus al cudiu delos nuevus reportagis!

No hay comentarios: