domingo, septiembre 02, 2012

Los andilis el'agua: Los Baldíos i La cañá dela Virgen

Las rutas del'agua paquí no tienin acabiju, pos ralu es el caminu sin charca, la senara sin arroyu o el cortiju sin regatu. 

Ayel anduvi vesitandu, en mi afán por dal conos caminus antiguus, varias charcas i vaus en el términu de Montiju, cerquina de Barbañu. 

Mapa antiguu del IGN dela parti vesitá
 Siguiendu La Calçá, busqué el cruzi con el cordel de Barbañu, entre Los Baldíos dela Çarça i El Enzinal. El cordel ajorra ata un braçu de Guadiana, direción sul, andi divan los ganaus pa La Cerrá, la Dehesa de Barbañu o La Veguita. 
Charca de Las Encantás
Cordel de Barbaño
 Lo primeru que vemus es la charca de Las Encantás (en Montiju dizin laguna). D'ella ya palremus en tiempu, con su estoria de leyenda i la rezienti recuperación ambiental. Palos que no lo supieran, ata ai unus quantinus añus, era una esterquera, andi tiravan ripiu, bassura i toa crassi de porquerías. Enque paeça mentira, es la costumbri que tienin por aquí muchus paisanus i impresas, que gastan delas charcas naturalis de Guadiana pa tiral los desperdicius (estu me da idea de hazel un endilgu delas charcas de Val-de-La-Calçá, paque veais delo que vos hablu). Cona recuperación del cordel, Montiju arregró tamién las sus charcas, abrevaerus i vegetación. La de Las Encantás hue un aciertu, pos ora cuenta con agua limpia, arvus de ribera, bancus pa merendal i en cartelinu ondi asseñala la estoria mítica d'esti lugal.
 Siguimus pol cordel entre olivaris, frutalis i maizalis que ya s'están ensecandu, comprovandu cómu'l caminu vá ajorrandu buscandu el ríu. Llegamus a un vau antiguu, el vau del segundu elementu ídricu dela ruta: el arroyu de La Vega. Tien tantus nombris que no sé essatamenti quál era el original, pos aquí los cachus de Guadiana i otras corrientis d'agua tienin nombris destintus sigún la parti. 
Arroyu de Los Baldíos/de La Veguita
Verea norti pola charca de La Veguita
 Es compricau sabel óndi naci esti arroyu, peru á de sel en angún sitiu entre Torremayol i Montiju. Arrecorri unus quantinus de km ata moril en La Cabrilla, cerca de La Calçá. Sigún la parti lo llaman arroyu de La Vega, arroyu de La Veguita, Corniquebrá, de Los Baldíos o El Caliente. Los parcelerus más nuevus no sabin ni cómu se llama, pos comu á passau con tantus otrus arroyus naturalis daquí, s'á convertíu en desagüi de parcelas i uertus, perdiendu assín el su nombri i la su función. En el encuentru con el cordel, uvu d'avel un pequeñu vau, oi desaparecíu pos está repuestu comu una puentina de hormigón i cimentu. Comu por aquí no passa ya el ganau, namás que cochis o tractoris que ván a assestil las parcelas o a passal las tardis de fin-de-semana enas ozenas de chalés que ai pola zona, el concetu de vau tamién está perdíu. 
 En atravessandu el arroyu vá una pista que no está enos mapas antiguus, de má que devía de sel anguna verea de ganau junta'l arroyu i que con el Plan Badajoz envirtierun en pista. Un poquinu a salienti, apaeci la segunda delas charcas, la charca de La Veguita. En verdá es un aliviaeru dela corrienti del arroyu, que s'alagava facimenti en iviernu. Antañu era otru delos puntus de abrevaeru pal ganau junta'l cordel. Aquella charca, comu passó cona de Las Encantás, la hizun esterquera i hue tamién recuperá en el proyetu de adecentamientu del cordel. Mesmu un cartel informativu mos impón dela fauna i frora dela charca i mos cuenta algu que desinquieta:

Debujinu dela charca
Lo más característico de la laguna de la Veguita es que cuenta con niveles medios de salinidad, que pueden derivase (sic) de la acumulación de productos usados en los tratamientos agrícolas colindantes, y que quedan depositados en el lecho de la laguna. En esta parte se desarrollan juncias y juncos muy tolerantes a dicha salinidad.
Charca de La Veguita
 En efetu, amigus letoris, esta, comu tolas charcas, regatus, arroyus i el propiu ríu, tienin en el hondón produtus químicus que de filtral-si alas capas freáticas hazin insalubri las aguas delos pozus. Otra delas pelras del Plan Badajoz..., peru esta ya es otra custión. El arroyu sirvi tamién de lindi al propiu cordel que se pierdi passandu el vau en una parcela, es dizil, ogañu no llega al ríu. Dexamus el cordel, desencantaus por vel ondi mueri, i aballamus pa Barbañu en cata de nuestra segunda corrienti d'agua. 
La cañá renti Barbañu
Vau junta'l charcu de Las Casitas
 En tiempus delos romanus, Guadiana estava mu cambiá. No corri pondi corri agora i no avían los mesmus regatus i arroyus que çarpean entre las senaras modernamenti. Se sabi que ena antigüedá, Guadiana passava más al norti, quizá polo que oi conocemus con el nombri de la cañá de La Virgen. Acibi esti nombri por venil del propiu sitiu dela ermita de Barbañu, ondi está la patrona delos montijanus. Qualquiera que vea un mapa comprendi densiguía que'l ancón dessagerau que hazi Guadiana renti a Barbañu uvu de tenel continuidá muchu á i que essa era, naturalmenti, pola cañá. Por quasi que 6 km, corri una hienda ena tierra -cañá- que junta dos puntus de Guadiana: unu junta la ermita i otru ena parti que llamamus Fernando-Alón. Esti braçu uvu de sel lo suficientimenti importanti comu pa derrotal la vida ena villa de Torre-Águila i empataratal la su conservación. Quandu llegamus a Barbañu vemus que, la cañá no naci en Guadiana, sino que de manera borronosa apareci por baxu delas casas, al norti del puebru, junta un canal. Quandu hizun el puebru de Barbañu en un cruzi de caminus consultarun con vezinus de La Puebla pa sabel si aquel sitiu era seguru pa entangá-lu i no saliera anandu. Entre essus vezinus estava mi abuelu, quien consejó de que no se hiziera allí puebru nengunu porque es un mesón que en qualquiera subía s'alagava. No hizun casu. 

Sitiu ondi seguramenti estuvieran los restus del molinu delos Coca
 Buscamus ora el caminu'l molinu delos Coca, otra joya perdía entre la fusca. El caminu vien de La Puebla i se conserva más dela metá convertíu en pista. Hui a buscal primeru el vau pol charcu de Las Casitas, otru delos braçus de Guadiana en esta parti, seguramenti el segundu tras retrael-si la corrienti dendi la cañá. El vau se aprecia bastanti bien i se conserva cona baxá características. Ora el charcu vá secu, peru en iviernu no es ralu que s'alagui en esta parti del caminu.
Camino'l molino delos Coca
 Diendu pal norti pol propiu caminu, buscu el últimu delos vaus, el que está sobre la cañá. Se conserva en parti, por condura la baxá, peru antigual de seguil, mos encontramus cona puenti moderna tapá de tierra.
Cañá de La Virgen
 El vau es curiosu, por tien una vegetación mu cantosa, ena praná ondi está: juncias, juncus i un cañal assoman verdosus por cima del arroyu.
Vau dela cañá
Abandonamus ya los caminus antiguus hechus pistas, los vaus envertíus en puentis de hormigón, las charcas que eran esterqueras i ora son pozus de produtus químicus i ahilamus ligerus enantis dela postura dexal-mus sina lus que mos alumbri la vuelta a casa.

No hay comentarios: