miércoles, septiembre 19, 2012

Los andilis el'agua: El pilar romano de La Garrobilla

Estus días atrás m'enteré que en el puebru de La Garrobilla tenía un pilal que llaman romano. No siempri las piernas están pa hazel-si quatru leguas palantri i quatru patrás cona calol que hazi polas tardis entovía. Oi m'arroché i ahilé pallá bien ligeru, porque no hazía airi. Atravessé cincu distritus -La Vara, La Puebla, El Montiju, Torremayol i La Garrobilla- ata dal con el pilal. 

Las obras que no s'acabarán ena vida por culpa del AVE empataratan La Calçá con maquinarias, obrerus i puentis a ca ná, unus meius hechus, otrus hechus de tó i otrus que ya pa ná valin enque lo alevantaran ai dos días.


El Pilar Romano
 Allegué al pilal más templanu delo que creíva, assinque me esparigí bien pallí echandu retratus i sintiendu los paxarinus del regatu. Lo primeru que me llamó l'atención huerun los dos letrerus que están ala entrá del cercau: unu enterava a tentu dela vegetación i otru dela fauna, más que ná paxarus. Prometi la pressencia d'enzinas, çarças, olmus, aldefas, bayonis i retamas junta pardalis, verderonis, mielras, chuchuruvías i colorinis. I no engañava...
Interiol dela huenti
 La huenti está literalmenti cobierta polos bayonis, cuyus purus sobressalientis incultan un peaçu bien grandi del suelu del abrevaeru.
Los purus del bayón
 El conjuntu poemus entendé-lu comu sitiu de passu palos viejus garrobillanus. Está junta el vieju caminu que diva de La Nava a La Garrobilla i junta un vau del arroyu El Pilar, conocíu agora por el arroyo Salao
 Las aguas manan duna huenti techá. El quairaínu está hechu de mampostería i ladrillu colorau con angunas lanchas de granitu. Está luzíu a cachus, otrus descubiertus, sin llegal alos dos metrus de largu por unu d'anchu. A un lau, comu da quarta, se vein los ladrillus del bastiol. Esta costrución se repiti en otra huenti que está ena ermita d'Esparragaleju i sigún testimonius, era tamién apaecía ala que avía en mi puebru enantis delas tragillas tiral con ella.
Techau dela huenti

Huenti
 La toça i el techu está hechu con lanchas grandis de granu, peru las paeris paecin que están hechas de ladrillu luzíu. La tradición dis que es romana, peru no lo creu. Es corrienti que las cosas que son mu viejas dizil que son romanas o moras. Enque La Garrobilla tuvu origin comu puebru en tiempus morus (el nombri ya lo asseñala), seguramenti esta huenti-abrevaeru-lavaeru lo hizieran en tiempus cristianus aprovechandu anguna huenti anteriol que avería.
 De frenti se destiendi un largu pilal que servía pa laval i d'abrevaeru palas bestias que passavan renti'l caminu.
Abrevaeru-Lavaeru
 El abreaveru está más repuestu i retién las aguas ata la parti sul ondi por mé dun canalinu incultu pola fusca que aboca en el regatu que está cerquina.
Largol
 Si no huera pola fusca (bayón, xaramagus) que está a un lau, el pilal puei vel-si bastanti bien. El sitiu lo aprepararun ai unus añus, peru paeci que á teníu pocu mantenimientu. Los moçus lo aprovechan pa bebel, sigún se vein polas botellas i vasus de papel duna soná marca de açuca con polvus (i essu que a meiu metru tienin bien presentera una papelera!)
Conjuntu
 Al lau, comu enantis dixi, está el arroyo'l Pilar. Enos letrerus i en mapas modernus reza "Arroyo Salado": lo ciertu es que no sé con qué nombri lo mientan los garrobillanus corrientimenti.
Arroyo'l Pilar
 El sitiu es lindu, porque al lau ai caballus i burrus, junta una vegetación propia de ribera (no vidi ucalitus, cosa rala pa estas tierras). A un lau del pilal ai un camininu que lleva a un vau que está adecentau pal passu del propietariu dela finca. En echandu los retratus passó el ombri i comu se vei abaxu queó el sonrueu del agua.
Vau con passilera
Dispués siguí echandu retratus, peru essu lo queu pa otru golpi. Queai-vus por de plontu en esti locus amoenus garrobillanu, sintiendu el remurmulleu del agua frujil, colandu-si entri las pieras dela passilera, regandu los bayonis dela huenti...

No hay comentarios: