miércoles, septiembre 05, 2012

El Cerro Gordo (Montiju)

De tierra colorá i cascajus está hechu El Cerro Gordo montijanu (digu montijanu, porque en Estremaúra ain muchus cerrus que son gordus, siendu unu delos más sonaus el de Badajó descogollau pola pómpora imobiliaria). Montiju es unu delos pocus puebrus, junta Lobón, que presenta el términu monicipal más acidentau de tós. Ríus, regatus, charcas, minas corrin entre lombinus i cotorrus, muchus aprovechaus d'olival o pa cereal. 

Mapa antiguu del IGN ondi vien asseñalau El Cerro Gordo
La puenti nueva por cima de L'Alcaçaba
ena carretera La Roca
 El Cerro Gordo es una delas elevacionis que has el valli de L'Alcaçaba. En estas tierras tan llanas namás puein vel-si cerrus acotandu los vallis delas prencipalis riveras i ríus, pos las demás corrientis son regatolus o cañás que están renti al suelu. Esti cerru, junta Las Cuestas o El Rescarvao, costitúi la prencipal elevación del valli de L'Alcaçaba
 Pola su sitación uvu de sel un lugal aparenti pa assentamientus umanus, pues cerquina está la rivera i ena parti de salienti corrin varius regatus (ala vista está que en essa mesma parti está assentau el cortiju que acibi el nombri del cerru). Amás es una elevación junta un cruzi de caminus comu se vei nel mapina i dendi el qual puein vel-si tolas fincas dal reol.
 Comu es un cerru importanti, pola altura i el sitiu, el Insituto Geográgico y Catastral tien hincau ena cotorina un puntu geodésicu, ondi reza: 
Vista de salienti. Al hondón la Dehesa Nueva.

Instituto Geográfico 
y Catastral
Vértice geodésico
La destrucción de 
esta señal
está penada por la ley.

No pon el topónimu del lugal ni l'altura, peru ya vo-lo digu yo: El Cerro Gordo, 243 m. En el mapa topográficu del IGN que veis arriba pon, sin embargu, 241 m, polo que no sé essatamenti quál es la altura "oficial".
Puntu geodésicu.
 El que se monta arriba vé perfetamenti los llanus de Los Arenalis al sul, con San Gregorio i La Centinela detrás. Estas tierras, desquitandu las que aprovechan la vega de L'Alcaçaba pa frutalis, están sembrás d'olivus. Una vieja copra de paquí canta:

Camino d'El Montijo,
por Los Arenales, 
se me perdió el libro
delos cantares.

I es que el caminu La Roca a Montiju atraviessa de manera parelela la carretera d'ogañu Los Arenales pa allegal al puebru.


Vista de Los Arenales. Al hondón los dos cerrus de San Gregorio i La Centinela

Pie-Yerro. Al hondón El Puro de Guadiana
Pa ponienti están la destensa dehesa de Pie-Yerro. Ogañu, parcelá, era una imensa finca, la más salienti que tenía el términu de Badajó i que acupava tola parti norti delo que es oi Guadiana puebru. Un poquinu más patrás están los Valles Reales i La Corregiora, que es pondi passa la carretera La Roca.

No hay comentarios: