domingo, julio 15, 2012

Los andilis el'agua: L'Alcaçaba i L'Alcaçabilla





Los que vivimus enos adientrus de Las Vegas Baxas mos cuesta entendel otru paissagi que no sea verdi i enllenu de vegetación. Alas vezis mos preguntamus: pui ata óndi llegarán las senaras? Ayel anduvi a vel unu d'essus arrayus que partin la naturaleza de manera natural, peru dela manera chocanti que namás las pressonas semus escapás de hazel.
La vesita mos llevará pola parti norti de Guadiana, entre lombus suavis ata la parti baxera ondi frúin L'Alcaçaba i L'Alcaçabilla.
Ermita de San Isiru
Passeu
 Arrancamus esti passeu dendi la ermita de San Isiru, en Guadiana. Por si entovía vos queava alguna duda de si la Igresia entovía alevanta nuevus edificius de cultu, aquí teneis la preva de que sí. La ermita prencipiarun a hazé-lla en un baxial ena primavera de 2010. Dendi entocis esti es sitiu de pelegrinación palos guadianerus el día del patrón los labraoris. Esta romería está mu arraigá enos puebrus de Las Vegas, mesmu los nuevus comu los viejus. Digu que'l terrenu es un baxial porque allina está la Charca Pie-Yerru. Esta charquina estava junta un cruzi de caminus prencipalis, que eran el caminu de La Roca a El Montiju i el de La Llavi. Quizá que no huera tan casual que la ermita uviera de hazel-si en esti paragi, enque ogañu el cruzi es otru.
 El lugal lo tienin bien aviau i adecentau, con barra de bal, ecenariu, merenderu i passeu, pos amás de sel lugal de pelegrinagi, la Charca Pie-Yerru acogi el Festival Joven Guadiana, ondi vienin bandas de rock de varius laus. 
Charca Pie-Yerru. Al hondón puei vel-si El Puru
 La charca está ogañu cercá i cuenta con una puenti de tabra al meiu pa poel cruzá-la. El nombri de Pie-Yerru le vien por estal ena lindi entre Los Vallis Realis i la dehesa de Pie-Yerru. Pie-Yerru (en castellanu Pie de Hierro o Piedehierro) era el apellíu del amu d'esta destensa hesa que acupa una parti bien grandi del terrenu de salienti del términu de Badajó. Ogañu ain familias con esti apellíu pa Montiju i La Puebla.
Caminu de La Roca a El Montiju
 Dallí mesmu cogemus el caminu de La Roca a El Montiju ala gocha. Esti caminu, alquitranau en el su últimu cachu, empedrau ata la rivera i de tierra dispués, hue una delas prencipalis vías de comunicación cola Sierra de San Pedru de patrás. El caminu arranca dun cruzi que ai ena margin isquierda de Lurianilla i atraviessa fincas grandis comu las de La Encinosa, El Cinchu, L'Alcaçabilla ata moril al sul de Los Vallis Realis. 

 Al su passu atraviessa L'Alcaçaba i L'Alcaçabilla, que son dos corrientis importantis que asseñalan los límitis del terrenu de dehesa i el terrenu delas vegas de Guadiana. 
Pieras del vau

 L'Alcaçaba es una rivera que naci dela confrujencia de varius regatus (El Corchu, La Campa) enas estribacionis la Sierra de San Pedru i va buscandu Guadiana alo largu de dehesas infinitas, lombus, cerrus ata  moril en el ancón de Los Novillerus, al norti de Balboa. Comu otrus idrónimus dela zona, guarda con celu el su nombri arábigu Wadi'l-Qasab, 'el ríu las cañas'. 

L'Alcaçaba
Quizá que los antiguus le pusieran essi nombri pola abondancia de bayón i cañalis, peru paeci un nombri pocu original pa una rivera, dá que las riveras toas paquí train essa vegetación siempri. Ogañu corri de manera más o menus regulal, con más caudal sigún ajorra pa Guadiana polos regueríus i riega colas sus aguas Montiju, Guadiana, El Acheí i Sarteneja. Tien muchus vaus, peru delos antiguus pocus quean i los modernus están inconociblis. El primeru que vesitamus está hechu a estilu badén, peru comu otrus vaus que ya amus vistu, tien aorillás montoneras de pieras grandis que costituían las viejas passileras pa atravessá-lu.



Vau L'Alcaçabilla
 Un poquinu más alantri sí poemus echal-mus una idea de cómu eran antañu los vaus. Siguiendu el caminu de La Roca, mos cruzamus con L'Alcaçabilla, que es un afrujenti del anteriol que ajorra paralelu a el ata moril un poquinu antis d'El Acheí. Esti vau, está ahondandu el caminu, que s'estrecha i conserva algunas pieras -pocas- ena su parti baxera.
L'Alcaçabilla
 L'Alcaçabilla es el arrayu natural del Pran Badajó. Al sul d'ella tomatalis, maizalis, arrozalis i algunus cotorrus con olivus: dallí palantri, la dehesa dorá s'esparrama ata ondi la vista no puei llegal.
Dehesa El Cinchu
 Los rayinus dela tardi de juliu cain más ligerus que los de juniu, de má que era mestel dil otra ves pabaxu, enque la golienda de siguil por essi caminu ata topal-mi con Lurianilla era bastanti huerti: essa sedrá otra estoria.
Vau L'Alcaçaba
Canal
 Siguimus pola vega de L'Alcaçaba pa ponienti, pressiguiendu al sol. Por un caminu d'acessu alas casas aislás i de mantenimientu de canalis, bandeamus la margin isquierda dela rivera subiendu i abaxandu barreras. Las retortuñas i la estrechura alas vezis hazían d'aquel caminu la ruta perfeta pa da-li alos pealis. De chopetón, un cruzi con un caminu que ajorra pala rivera: Acontinará palantri? Qué sabemus allá! Mejol era vestigal velallí. Ajorré i vidi otru vau, más nuevu, con peñuscus grandis atierraus alos bordis de vel síu aquellu ena antigüedad otra vaera. Por cima lo atravessava un aqüeductu delos modernus, de rollus i cobierta de cementu, peru que namás que por refrexal-si en el'agua crara paecía que lo atalantava con una galanura natural.
 No mu desviau, justitu tamién en un cruzi está un vieju campussantu, que polo que ei poíu abrigual era el que tenían los alcaçabeñus antañu, peru que está bien desviau del núcliu. Ora corona los arrozalis, peru no con muertus, sino con ganau. No es la primel ves que vemus pa estas tierras costrucionis religiosas aprovechás pal ganau o pa metel los aperius.
Campussantu
 Vais a izil que contrasta cola ermita cola que prencipiamus el viagi i assín es. Dambas a dos costrucionis están en cruzis, siguiendu essa costumbri pagana de santigual los cruzis de caminus onrandu alos diosis i alos muertus. Curiosamenti, esti cimenteriu, repuestu en corral de ovejas, simboliza mu bien la metáfora del pastol i la piara del cristianismu: escaencia delos lugaris de cultu porque no ai qué rezal i el ganau ora pasta al cudiu no dela crus, sino dela monea.
Torri i crus el cimenteriu vieju
 Dexai-mi que sea una mijina poeta colos retratus, cola crus i el orihoscu al atrás, colas ventanas de granu que devoran el crarol duna vega ferti i delas rejas que acostodiavan alos muertus, porque namás colas ruinas del passau se premiti la hechura de versus con una máquina de retratal.
Ventana de granu
Ventanas enrejás

Las vegas de L'Alcaçaba




Cortiju de Buena-Vista

 Dispués del momentu poéticu, ahilamus palantri, subiendu i abaxandu otra ves barreras que mos quitava delas refressionis d'antis i mos envencijava contra'l vientu de ponienti, esparigiendu-mus el'alma con el verdol dela vega i los goloris de frescança i trebaju.

Buscandu el Canal de Montiju, cogemus ya el alquitranau pa recorrel con ligereza los cerrus d'El Rescarvau. Estus terrenus, regaus ya con canalis, tienin olivaris, maís i arrós tapandu ca cerru i ena metá, cortijus, seña dela vida rural d'otrus tiempus, siguin a arroeal-si de senaras inabarcablis.

El Rescarvau, 216 m
Enantis de dil patrás, ahuyendu dela caía dela tardi i del airi huerti, era mestel arreparal en unu delos pocus puntus geodésicus que ain en estas planás. Se trata d'El Rescarvau que colos sus 216 metrus s'assoma ala vega con modestia i umildá, peru ergullosu de conserval un nombri prerromanu.

Naidi puei izil-mus que Estremaúra es un erial. Naidi puei izil-mus que estamus faltus d'agua o de tierra, porque sin medil ni lo unu ni l'otru, abondecemus de dambus. I quien namás conoça el gris delos enceraus, el brancu delos tassis o el verdi delas farolas, no tien derechu a dizil-mus los coloris que tienin estus campus. Aquí el'agua, la tierra i el azul del cielu tienin tonus de pardu, colorau, azul, verdi i brancu que alimentan los nuestrus ojus i namás por ellu, semus más felizis.

No hay comentarios: