viernes, julio 13, 2012

Los andilis el'agua: El Antrín i Guaxira

Las corrientis que vienin del sul, por suerti d'agua, án dau alos puebrus del otru lau de Guadiana vida, regandu la tierras que, antañu olivaris o parralis, se destiendin ata quasi que L'Albuera. Los que siguimus essus andilis del pastueñu correeru el'agua, arreparamus enque, justu enantis de moril, es quandu más frorencia i viciu dan alas tierras. Es el casu de dos delos afrujentis más importantis que riegan las tierras de Talavera: El Antrín i Guaxira.

Ríu Guaxira

El ríu Guaxira es largu i inregulal. En veranu andiquiera se vadea, peru en iviernu siempri á traíu rompeerus de cabeça i más de dos disgustus alos que tenían que dil de Méria a Badajó por aquí. Mo-lo acuerda Antonio Ponz en su Viage de España esti ríu dixendu: 

Entre Lobon, y Talavera se pasa un arroyo llamado Guadaxira, intransitable, y peligrosísimo en los inviernos, en que la falta de un puente es causa de muchas desgracias, y de notable detencion de correos, y pasageros: gran falta en un camino tan principal como es este

Si Ponz tuviera de volvel a passal oi por Guaxira, cuya suspresa le diva a estal en viendu que oi son tres las puentis, toas seguías, que cosin las dos margin del ríu. En el retratu dembaxu está el más antiguu i más políu, con muru de piera i hechura rezia.

Puenti sobre Guaxira

El ríu Guaxira hue una huenti de abastaeru dendi los primerus tiempus del ombri por esta parti, comu son los assentamientus de La Pixotilla (afrujenti de Guaxira) o los antiguus puebrus que án díu passandu entre los cerrus polos que passa enantis de moril. No en baldi los musulmanis mentavan a esti ríu Wad ash-shira, 'el ríu'l abastu'. Si enas tierras greas del sul regía la vida delos antiguus, formi s'aboca a moril, enllena de viciu la vega ata laval los ojus del verdol que se puei vel dendi los tesus dela zona.

El Antrín
 Entre Guaxira i Los Limonetis, no mu largu de dambus, vierti las sus aguas El Antrín. Rivera alas vezis, regatu otras, dispués que, comu Guaxira vien de tierras del sul, se despoja del borrundangu de pieras i barru más pallás de La Isla Baldía. Ena su ribera arvus viejus i nuevus, bayuncus, enzinas i chaparrus, lo incultan delas senaras infinitas de maís. Tapocu el su nombri es en baldi, pos Antrín vien de Interinum, que dispués de romanceau quiel dizil "ríu interiol", por passal entre Guaxira i Los Limonetis, siguiendu la antigua tradición de mental las cosas pol sitiu que acupan.

El Antrín dendi'l Canal de Lobón
 Junta la puenti del Canal de Lobón, el verdinal delas prantas paeci más verdi con el sol de juliu i el afán delos  parcelerus en siguil cola costumbri que truxun d'América los sus antepassaus  de sembral las prantas de pallí aquí.
El Antrín Secu
 Un regatinu, apenas visibli pola fusca, peru presenteru pa quien lo pressigui, busca vergonçúu la isla El Traperu pa moril al son delas graveras. Un poquinu enantis de hazé-lu, çarpea entre las senaras partiendu los bancalis. Es el que llaman El Antrín Secu, ramal d'El Antrín que desaparta pa ponienti.
Cortiju de Pedro Gallego
Ena su rivera, comu seguidumbri d'antiguus assentamientus, está en una rinconá verdi el cortiju de Pedro Gallego, colas paeris sin embarral ai muchus añus.

La vega que amollecin Guaxira i El Antrín está entre las más ricas i fertis de Guadiana: siempri úmidas, veregel de veranu i cura palos ojus cansaus de qualquiera que por allí passi.

No hay comentarios: