lunes, julio 02, 2012

La cañá Las Bardocas

Ayel tardi, entri que la genti estava embaía con el fubu, hui a esparigil-mi un ratu cola becicleta. Anduvi pa unus caminus que no avía transitau enantis, peru que namás pola golienda'l topónimu hui a vel qué era aquellu. Pa Xévora ai una finca destensa que llaman Las Bardocas, nombri que entovía ei síu escapás de encrará-lu (poía venil de bardu i el sufixu -oc-, tan corrienti en esta zona que linda con Portugal, peru ai que vestigal mejol).

Cañá Las Bardocas

Rivera de Guerreru
 Alo largu d'essa finca i de tolas que le siguin ata Novelda corri una cañá, oi convertía en pista, que vá dendi la rivera de Guerreru ata Xévora, ondi empalma cola rayana cañá de Sancha Brava. Esta cañá atraviessa la parti más ocidental delas vegas sin desvial-si de Guadiana. Antañu l'atravessarun piaras i recuas en cata del verdol las vegas de Xévora, La Cabrera o Guerreru, peru ora apenas passan por allí los parcelerus i algunus tractoris.


Vau la cañá
  El tramu que vá dendi Guerreru ata Novelda es bien lindu, pos ahila entre frutalis i maizalis en bancalis altus, entre los varius cortijus d'El Pesqueru i la vegetación de ribera comu lloronis, alisus, bayonalis, çarçalis i ucalitus. 

Pieras la passilera
 Formi se llega, algunus cartelis asseñalan que lo que allí ai es un badén, peru lo ciertu es que lo que está por baxu es un vau, un vau antigüíssimu i bastanti importanti, dá que la vía comu cañá se cruzava al pocu cola calçá romana que subía. Entovía puein vel-si la conseña las pieras que hazían de passilera en el vau.
Empedrau de rollus
Salía del vau
 El vau está arroeau de vegetación por tós laus, hiziendu colás ala sombra d'árvulis. El caminu uvu de estal empedrau, sigún se destacan algunus cachus del mesmu. 

La vía del tren que cruza tolas vegas, no hazi más que siguil los caminus del ganau antiguus, sean cañás o cordelis. El destraci que estas siguin, derechas, buscandu vaus i lugaris llanus, hue aprovechau polos inginierus pa echal los hierrus delas vías, peru pocu se tien en cuenta esti hechu.

Comu aconteci con el vieju caminu La Estación, la cañá de Las Bardocas está asseñalau i con endicaoris, peru por parti dengunu reza el su verdaeru nombri.


1 comentario:

Caminante-SPG dijo...

Gracias paisanu, uno que ha recorrido esos caminos de chiquinino.