viernes, julio 06, 2012

El Navíu - Malpartía

Las Vegas Baxas siguin susprendiendu. Los sus tesorus están ala manu, peru incultus entre senaras de maizis i bosquis de frutalis. La su arquitectura rural de cortijus, la hechura vieja los caminus de piera, los vaus i cañás, los cientus de regatus, braçus, islas, arroyus i riveras que entangan la antigua morfología d'estas tierras siguin a estal velaí, comu los lexis i engranagis delos movimientus delas pressonas. Lo que es que, paeci que colos puebrus nuevus i las carreteras que están por cima, no mos tomamus mucha cuenta d'ellu...

Oi vos traigu dos cortijus: El Navíu i Malpartía. Dambus dos están ena margin isquierda de Guadiana, peru el primeru segunda con Talavera i el segundu linda con Balboa.


El Navíu, dendi la portera
 El cortiju d'El Navíu (nombri curiosu pa una finca), se halla ena carretera'l aropuertu Badajó, ala derecha. Es una casería no mu grandita, con corral i dependencias, junta un palmeral. Ogañu está farrungau, peru uvu de sel importanti antiguamenti. La vivienda está a salienti i tola costrución está perfetamenti dispuesta arregru alos puntus cardinalis. 
Vivienda i palmeral
 El sitiu es estratégicu, pos está en un cruzi de caminus, cerca del passu la cañá El Bercial i al abrigu del cursu dela rivera de Los Limonetis. Un casu estuvu rezientimenti en esta mesma finca, ondi endañarun a un guardia-civil.
Los Limonetis
 Más palantri arranca el caminu a Malpartía. Uvu de sel caminu prencipal pa acuíl alas fertis tierras de vega ena parti de Los Novillerus, pos tien cachus empedraus i cuenta con un vau, antañu natural, oi con badén, por cima de Los Limonetis.
Vau nel caminu Malpartía

El caminu va derechu, pal norti, i vá abaxandu ata ponel-si a frol de tierra del propiu ríu. Nuevamenti, en otru cruzi de caminus, el que subi a Guadiana i el que recorri otrus cortijus prencipalis comu el de Los Novillerus o El Braveru, s'alevanta el antiguu cortiju de Malpartía. 
Cortiju de Malpartía
 Comu otrus tantus sitius importantis de Las Vegas Baxas hue un antigua aldea o lugal. Las sus referencias más antiguas son del sigru XIII, essatamenti de 1287.
Mapa antiguu ondi apaeci Malpartía comu pobrau i Talavera amurallá

 Por entocis ya era un despobrau, sigún mos cuenta Solano de Figueroa i queava en ereamientu de cavallerus pacensis d'aquellus tiempus. En siendu assina, esti sitiu era lugal quandu la conquista cristiana, comu otrus tantus caseríus dela zona oi hechus cortijus.
Navi junta la vivienda
 Dá que era caseríu, uvu de sel en tiempus romanus assentamientu rural o villa, peru no tengu datus comu pa assín demostrá-lu, quitandu algunas prevas comu la presencia de pieras grandis partías junta'l cortiju i restus de granu lavorau en el caminu que lleva ata él. Sí, ala contra, ain restus romanus un quilometru al ponienti, junta Balboa, dientru la mesma finca.
Chufardu i navi
 El sitiu del cortiju modernu, comu digu, está en un cruzi de caminus, polo que seguramenti esti mesmu huera ondi se encontrava unu delos edificius prencipalis del caseríu. La disposición del cortiju es rala, pos está partíu pol propiu caminu, queandu ala isquierda la vivienda i ala derecha las dependencias agrícolas, del ganau i delos trebajaoris. Las costrucionis son nuevas, de primerus del sigru XX pola hechura, peru seguru que alevantás encima de otras. 


Hornichis
 Ain güilis, tinaus, buhíus, navis i vivienda en esta parti. Comu el cortiju de La Cuvillana, esti tien un piringutu ala entrá. Por detrás está un tinau en baxu dunus ucalitus, dos buhíus típicus delos cortijus dela zona i la parti del ganau i vivienda.

Buhíu i tinau
 Los dos buhíus, hechus comu choçus modernus, están desviaus dela vivienda. Unu está renti'l caminu, el más grandi, una mijina más arriba, i el otru, en linia cola navi, más chicu. Dambus dos tienin una ventanina quairá i una o dos hornajas. El techu, entabrau dientru, teja arriba, es a dos aguas. Dambus dos techus están farrungaus del tó, queandu apeninas algunas tabras i vigas.
Piringutu
 El piringutu o monolitu es algu que se vein en algunus cortijus ala entrá. Unus asseñalan el nombri la finca i otrus la propia entrá. La su hechura cambian muchu, siendu unus de ladrillu, otrus cementu, etc. peru tós se caracterizan por sel piringutus que imitan colunas  o costrucionis de granu.

Navis
 El nombri de Malpartía es típicu de tiempus dela consquista cristiana. Sigún Bernal Estévez, el nombri de Malpartida uvu de sel dau por repobraoris salamanquinus o abulensis. Assín ain varias Malpartías por Estremaúra, unas pobrás i otras despobrás comu esti casu: Malpartía de Prasencia, Malpartía de Caçris, La Malpartía (Alcántara), Malpartía (despobrau entre Trujillu i Xaraizeju), Malpartía La Serena i esta Malpartía. Ain Malpartías en dambus dos laus, leonés i castellanu i tuviendu en cuenta que esta parti hue empuebrá por leonesis, portuguesis i gallegus, lo mesmu que la de Alcántara i quizá que la de Caçris tamién, no paeci que tenga que vel muchu la Malpartida salamanquina con estas de paquí. Apenas si poamus dizil que se trata dun nombri de conquista común a dambus laus.

Chiminea
 La parti que uvu de sel de vivienda dientru dela navi se destaca pola grandi chiminea que abarba dentre una parra. Esta chimineas las vemus ena huerça los cortijus de paquí, alargá, encañoná i colos uequinus arriba i encalás.


Estus cortijus son una delas muchas muestras dela arquitectura tradicional en el campu. Son costrucionis de finis del XIX o primerus del XX hechas sobre otras más antiguas. La su tipología modernista no vos á de despistal, pos escondin una estoria que remonta alos tiempus lusitanus o anteriol i que de manera más o menus ininterrumpía án estau empuebraus, comu villas, caserías, lugaris, aldeas i, ora, cortijus. 

Bibliografía:
  • Bernal Estévez, Á., Poblamiento, transformación y organización social del espacio extremeño, Editora Regional de Extremadura: Mérida, 1998.
  • Cansado, C. et alii, "Las murallas de Talavera la Real" en Revista de feria de Talavera la Real: 2004.
  • Castaño Fernández, A. M., Los nombres de Extremadura, Editora Regional de Extremadura: Mérida, 2004.
  • Guerra, A., "La dehesa y villa despoblada de Malpartida" en REEX, XXXVI: 1980.

No hay comentarios: