sábado, junio 30, 2012

El caminu La Estación

Antañu las maneras que avían de dil dun sitiu a otru eran más cenzillas i sufrías que agora. Quilometrus de caminus que eran cruzaus por carrus, bestias, ganau i pressonas i atravessavan hoyancus, vegas, cañás i quebrás i alas vezis, ríus. Los más viejus aquí s'acuerdan delas ampias balsas i barcas que avían pa cruzal Guadiana, pa ajuntal unas fincas con otras, unus puebrus con otrus. El ríu Guadiana no era un sitiu que se puiera achancal assín comu assín, pos apeninas avían vaus con passileras i los que avían en tiempu metíu d'agua eran mu perigrosus.

Quandu echarun las vías de tren por esti valli, los prencipalis puebrus tenían su apeaeru o una estación. La d'El Montiju era la más soná, peru tamién avía una estación en Talavera... peru a más de 8 quilometrus. 


Guadiana junta'l caminu La Estación
 Pa llegal a ella, los talaveranus tenían de passal Los Olivares ata llegal al ríu: allí tenían de cruzal Guadiana pola parti ondi está agora El Badén, enque alas vezis tenían que dil-si bastanti más largu por mé dela huerça'l agua. Dispués, al norti, tenían que passal por L'Alcaçaba cogiendu La Calçá ata afrental-si la vía.


Casilla
 Ogañu, el vieju caminu sirvi pa llegal alas parcelas, ala depuraora o algún que otru cortiju. Con el regueríu á perdíu parti del su destraci original, sobre tó en el tramu entre Guadiana i L'Alcaçaba, enque por suerti se conserva la parti más apreciá, que es el cachu que corri en vera'l ríu. 
Endicaoris
 Amás está catalogau comu una delas vías naturalis de Guadiana i está ata asseñalau con endicaoris ata la parti de Torre-Chica

La Puenti de Torre-Chica
 Entre tupíus maizalis i bosquis de frutalis corri entre bayonis un braçu importanti de Guadiana, de bastanti anchón alo primeru ata moril un pocu más alantri en Sarteneja. Que esti braçu uvu de correl con bastanti agua lo muestra una puenti inculta en Torre-Chica, de hechura moderna, peru rezia, pocu transitau.

Caminu i braçu
Esti tramu que recorri dendi El Badén ata Torre-Chica, pol veregel de árvulis de ribera comu lloronis, ucalitus o higueras i frutalis i maís, cola postura, es una vía pa embaíl-si con el chiribeu de qualquiera páxaru a precural la queá o el remurmulleu del agua frujiendu en baxu.



1 comentario:

Carlos Del Sol Mesa dijo...

Es curiosu que pa quandu l'Estación de Talavera puu servil pa puebrus mas próssimus antoncis recién costruyíus: Novelda, Puebru-Nuevu etc., pa mesmu antoncis estava ya desasajá i abati que barrundía, avinculá quiciás pol mé d'enhiestal-si tan cerca Badajós.