jueves, marzo 22, 2012

Limpia'l molinu (Fasi IV)

Ayel hui cola morralina otra ves pal molinu a echal un ratu ena poa i descuaji de çarças. Enque hazía airi, la tardi estava calorosa. Los frutalis la huerça d'ellus ya án perdíu la frol i están echandu ojas. Namás quean los más tardíus, enque ya plontu prencipiarán a afrorecel los peralis.

El trebaju d'oi era siguil limpiandu i enanchandu la entrá al molinu a l'altura el muru que se destiendi por frenti'l molinu. Esta ves cogí la parti derecha del muru i partiendu dela esquina que ya tenía desenterrá limpié de çarças el lau del muru sobre'l metru i mediu.

Muru derechu enantis de limpial
Mesmu muru dispués de limpial



















La faena no hue mu enliosa porque en essa parti estava el çarçal más craru i avían pocas matas que salían daí. Lo compricau hue endispués arremangá-las i haciná-las patrás, en no tuviendu una horquilla ni pala ni achiperri dengunu más que palus secus.


Parti derecha del muru
Parti derecha dispués de quital las çarças i desenterral
 La segunda parti'l trabaju diva a sel prencipial a delimital el anchón del muru. Con una paletina hui desquitandu el tomu de 15-20 cm que tenía por cima ena parti la esquina. Formi diva escavandu nel güecu la puerta, di con más ladrillus i una lancha de piera a unus 35-40 cm más patrás del muru. Me sospechu que sea el primel escalahansu i que'l acessu al molinu tuviera anguna serii de escalonis pa salval el desnivel que se vei enos retratus.

Entrá del muru ena fasi III

Primel peldañu
 Me llamó l'atención que por cima del primel peldañu uviera un otru ladrillu en forma de embúu achicandu la puerta. Comu es muchu el tomu de tierra i no tenía ayúa pa arretirá-la, dexé la escavación en essi andal ata otru viagi, pos las raízis las çarças están bien agarrás i alos laus entovía tengu limpiu el suelu, siendu faci encraval-si los dientis las ramas poás.

Entrá dendi dientru'l molinu
Dispués que eché dos oras de limpia, agarré i midí el molinu con una vara i a quartas i hizi un debujinu dela pranta'l molinu. Quizá que vos intessi sabel que'l molinu midi unus 13,20 m de largol por 5,50 d'anchón. Tien  dos muelas baxeras de 1,20 m i seguramenti esté la cimera dela primel d'ellas enterrá endentru. Tien tres vanus que hazin ventana: una al hondón, otra de guía por cima la segunda muela i otra ala entrá, siendu la más grandi i larga la dela paré del hondón. Amás ai un tragalús en el techu conservau i un hornichi nel muru'l hondón. Essi techu está assujetau por tres arcus que hadrían una bóveda de mediu puntu de ladrillu, dela que namás se conserva la parti del hondón i los arranquis dela siguienti. Los arcus están bien conservaus el del final i el segundu, estuviendu derrotau el primeru d'ellus. Ena parti de huera, ena paré de ponienti ain quatru contrafuertis. El suelu del molinu no s'atina a vél cómu es, pos ai un tomu de tierra i retejonis de barru dentre 5 a 25 cm. Por baxu los güecus las compuertas ain cachus grandis de piera entre l'agua i el barru i enque no se vein mu bien seguramenti sea granitu (la segunda muela cimera?). Tamién ayel comprové que en abaxandu del bancal pola verea que ai hecha i que ei supuestu que á de sel la original por el peaçu de muru que ai alo primeru, ain cachus de ladrillu i piera enterreaus, seguru que pertenecientis a essi liençu i que despressas están atierrás al reol.
Por más que ei buscau i arrebuscau enas pieras del molinu, ala entrá o dentru, no ei síu escapás de vél fecha denguna de costrución. En el Diccionario Madoz, de 1850, se mienta un molinu, peru ena otra orilla del que dizi: en este sitio desemboca el Guadajira y hay un molino harinero de 4 piedras, y 1/4 leg. después la rivera de Antrín. No conoçu ni tengu enteración denguna de que ena otra orilla aiga molinu dengunu en esta mesma parti de Guadiana, peru en essi dicionariu se dis que está entre los términus de Talavera i Lobón, entre los ríus que mienta, i que tien quatru pieras. No tengu tapocu denguna otra referencia decumental a tentu'l molinu i la genti del lugal tapocu lo conoci. Siguiré envestigandu.

No hay comentarios: