domingo, marzo 18, 2012

Festival Folklórico Valdelacalzada en flor 2012

Ayel hue un día grandi pa Val-dela-Calçá. La primavera truxu consigu, amás delos coloris i los goloris duçonis las froris los frutalis, los sonis estremeñus más auténticus. En viniendu de tós laus dela nuestra geografía, se juntarun en una mesma praça sanvicenteñus, montijanus, oliventinus, garrovillanus delas dos Garrovillas, piornalegus, salmantinus, talaveranus i valviensis.S'ajuntarun en cata delos sonis del tamboril i la frauta, dela bandurria, del alcordión, de morterus i almirecis.

Eran la media palas dozi i en La Praça sonavan los sonis charrus i estremeñus delos tamborilerus junta Los Arcus. La huenti reçumía froris i entre'l rameagi se destendían telas rosas i brancas. Los zagalis vestíus d'estremeñu s'aginavan pola su actuación i correteavan entre los mayoris. Estus, velallí, palravan en colrichis, escusseteavan los estalachis d'artesanía o estavan al tentu los tamborilerus.
Estalachis en Los Arcus
Decorau el ecenariu




Echandu retratus
Pui, cómu La Vara se rebullía tantu? Dunus añinus a esta parti, s'á veníu celebrandu el afrorecel delos arvus tamién con música. Del zumbaeru las abejas bregandu pal polin, el chillíu el'aguanievi atravessandu las senaras o el desinquietu horicheu las garças tras delos tractoris namás puein disfrutal las casas aislás, de má que se tuvu a bien trael los sonis estremeñus al puebru i festejal assín la primavera.
Ensayandu-si los grupus participantis
Pala meyudía se dio la ordin alos tamborilerus dela associación 'Santiago Béjar' de prencipial el passacallis. En siguiendu, ozenas de zagalinis en compaña delos mayoris: desfilavan Alonso de Mendoza, de La Garrovilla, Agla de Montiju, los talaveranus Luis Chamizo i ena çaga los muchachus d'Araval.

Passacallis pola calli La Luna
La ruta era corta, peru polía: desfilarun al son del tamboril i la gaita pola calli La Puebla, San Pedro, La Luna, la praçuela El Pilal i al regolvel, la calli Calçá ata La Praça. Los granitus dela huenti de la calli La Luna s'estremecierun i los naranjus, que luzían los tronconis con froris propias d'otrus arvus, s'enrosarun deque barruntarun el gentereu.

Pola calli La Luna
Dendi los balconis i las puertas, tras d'aparatus o cola vista denúa, los vareñus s'emocionarun en viendu esti políu desfili.
Las zagalinas garrovillanas de Alonso de Mendoza
Quantis que llegarun a La Praça, los tamborilerus alevantarun los sonis las sus gaitas. Las cancionis garrovillanas abrierun el festival i siguierun las montijanas de Agla. Entremediu los tamborilerus siguían gastandu dela cachera i assoprandu polas frautas notas d'otrus tiempus. Hizimus buena gavilla: me dixun que de juntal-mus un grupinu de 10-12 pa Badajó mos poían dal crassi de gaita i tamboril.

Agla
Luis Chamizo, de Talavera la Real
El grupu de Talavera luzió un hatu campusinu bien cudiau, gastandu los sombrerus i las chambras d'antañu. Siguierun los muchachinus vareñus de Araval con bailis agis i coloríus.

Araval, de Val-dela-Calçá
Dispués se para pa merendal los envitaus. Passandu las cincu, ya tardíus, se hizu otru desfili, cogiendu esti viagi La Puebla-Ronda Salienti-La Luna-Calçá ata llegal ala ilesia, en cuya puerta se acolocarun los grupus tós pa una retrataúra familial.
En entrandu en La Praça

Ala puerta la ilesia
 A media tardi prencipiarun los mayoris colas sus danças i coreografías bien ensayás. Abrierun la tardi los sanvicenteñus La Besana, seguíus delos garrotis El Escaramujo. Cuya suspresa les estuvu al púbricu en viendu al Harrampras, assustandu alos muchachinus colas sus carantoñas i gerigoncias.

El Harrampras
Dispuesinu tocarun la despedía los tamborilerus que tuvun d'aballal. La Encina los siguierun colos sus sonis oliventinus i d'otrus laus con bastanti presencia la bandurria i del colorau los tragis los bailaoris. Arrematarun unus mejoraus Araval con cancionis nuevas i bailis mu bien cordinaus. La entrá ena Federación Extremeña de Folklore la tienin bien merecía.
La Encina, d'Olivença
Músicus d'Araval
Hue un día largu i divertíu, cargau de sonis, bailis i coloris comu nunca antis á teníu esti puebru de Las Vegas Baxas. Hue un día grandi de revindicación delo autóctonu i de gozi con otrus estremeñus dela primavera valviensi. Que se luchei por esta fiesta comu Fiesta de Interés Regional está ena manu delos cientus de pressonas que án colavorau, dendi cudiandu los frutalis en el campu, decorandu callis, praças i casas con froris ata organizandu el festival d'ayel. El déssitu queó comprovau, la fama dirá corriendu a tós laus.



No hay comentarios: