viernes, enero 20, 2012

La Rabúa

Pallá, pandi los arrayus del términu monicipal de Val-dela-Calçá se destiendin contra los de La Puebla, colandu El Paxaritu i unas quantas de casas aislás, se halla incultu entre imponentis ocalitus el cortiju de La Rabúa.


Pocu es lo que sabemus d'esti lugal. Junta los cortijus de La Rueda i La Vara, el de La Rabúa es  el que menus enteracionis ai en decumentus. Los valviensis apenas ahilan pallá, desquitandu angunus jornalerus que vaigan a cogel bróquilis o a poal anguna parcela de frutalis delas pocas que pa essi sitiu ai. 


Landeandu ei vistu que esta finca era propiedá del cleru de Badajó en el sigru XVI i que conas continas despropiacionis passó a manus privás. Con tó i con essu, los materialis hallaus velallí enas tierras de La Rabúa paecin que mos encrara quantu quantu la custión, pos esti sitiu hue pobrau muchu á. Peaçus de granitu reutilizaus i otrus restus de piera labrá que se vein esparramaus alreol son el testimoñu más fiel ogañu.



Los mapas parcelarius mos da los nombris de "Novillero de la Rabuda", enque ena entrá reza en azuleju "Vega Rabuda" i Ángel J. Traver mos da los nombris de "Rabuda de Arriba" i "Rabuda de Abajo" ena descrición las fincas cuyas tierras huerun despropiás pal reguedíu. A tentu'l nombri de La Rabúa (assina es el topónimu ena lengua corrienti), pocu poemus dizil más que un tasmeu pol sentíu ganaeru o, quizá pol nombri que le damus paquí al páxaru Cyanopica cyana: la rabúa, llamá en otrus laus çalandraja. A tentu del primel nombri de Vega, está polo craru, pos velaquí tenemus el topónimu de "La Vega" en La Puebla, que es el nombri que tien la ferti mesa que se destiendi entri el puebru i el ríu, amás de "La Vega de Méria" i "Las Vegas Baxas", esti últimu más rezienti. Vega s'está en que es d'origin prerromanu, del íberu.



El cortiju está arroeau por un bardu, desquitandu unu delos sus laus que es paré. La entrá está protegía por una engarilla cenzilla dendi la qual se vei la puerta d'acessu al patiu interiol, formi la tipología cortijus d'esta parti comu el de La Vara. Esta puerta tien el bastiol baxeru hechu de granitu, en tó comparanti alas puertas los corralis las casas de labraol d'El Montiju o La Puebla: colos pinotis alos laus i la roera palos carrus ena piera.


La vivienda está careá pa salienti. Es duna pranta namás, desquitandu lo que devería de sel el palomal, sobressalienti ena parti trasera. La fachá está arroeá de yeira, con grandis ventanalis enrejaus astilu las casas de labraol. La puerta d'entrá costa de portalillu. Por cima está el nombri'l cortiju i coronandu un santu con el lema AVE MARIA / PURISIMA // SIN PECADO / CONCEBIDA entreviendu-si dendi ahuera. 



No se vei dendi ahuera escúu familial dengunu, lo que no quiel dizil que no tenga o huera teníu, pos otrus cortijus comu el de La Vara o Torre-Fresno entovía luzin imponentis los sus escúus. Lo que sí se vei es la típica chiminea corría delos cortijus del lugal, sobressalienti junta la puerta al corral.




Pola parti d'atrás se destiendi un grandi jardín, cola anchuridá del cortiju. Direción al sul, se vei el pozu, la entrá al mesmu i l'alberca. La costrución p'abaxal al pozu es moerna, pon la fecha de 1949. Esti tipu de cueva se vei en varias parcelas dela parti de La Vega i con una hechura aparecía. Enantis del reguedíu, el riegu pa estas tierras se estilava hazel con alberca, sacandu el agua del pozu por mé de norias o desviandu maniantalis ata enllenal las albercas. Albercas ain en antiguus cortijus de pa Fernando-Alón, Las Corralás o La Vara.




Otru de los pozus, el más antiguu pola hechura, tien brocal de ladrillu con piera cimera enteriza i arrematau en un arcu simpli que no conserva el carrillu. Esti era la crassi de pozus que avían enos cortijus viejus i que, desgraciámenti quearun endrentu del propiu terrenu del cortiju o huerun derrotaus.



La tierras de La Rabúa, lo mesmu que las de La Vara, El Carneril, El Condau de Torre-Fresno o La Rueda huerun despropiás por mó del Plan Badajoz, siendu las sus tierras arrepartías en destintus viagis alos colonus. 




Las lavoris de canalización, destraci de caminus i apreparación de bancalis sacarun pieras i restus arqueológicus, míseri conseña delos que vivierun enantis aquí. Con fortuna, angunas pieras grandis  huerun gastás otra ves ena costrución, otras huerun tirás a Guadiana i otras entovía están tirás, acachinás polas grás i los tractoris, ala vera de caminus i canalis, sin querel dizil ná a naidi, cargás de estoria i múas ala huerça.


Bibliografía:
Traver Vera, Á. J., Historia cotidiana de Valdelacalzada, Ayuntamiento de Valdelacalzada: Badajoz, 1998.
Duque Espino, D. M., "Estudio y evolución de un modelo territorial agrario: el poblamiento protohistórico en las Vegas Bajas del Guadiana", en Norba: Cáceres, 2001, pág. 23-62.
Mira Caballos, E., "La propiedad en el término de Badajoz antes de la desamortización".
Maldonado Escribano, J. El cortijo en la tierra de Badajoz, Junta de Extremadura: Badajoz, 2008.
Mapa parcelario de Valdelacalzada, Ayuntamiento de Valdelacalzada.

No hay comentarios: