jueves, diciembre 01, 2011

Valle-la-Çarça

La genti de Lobón llaman Valle-la-Çarça a unu de los hoyus a ponienti'l puebru i que vá a dal a una mesa destensa entre Guadiana i los cerrus. El nombri que apareci comu oficial es "Valdelazarza". Está por detrás de La Tiesa, unu de los llamaus "Cerros de Lobón". No sé que me arrastró a esti lugal: supongu que la golienda.

Valle-la-Çarça. Al hondón La Puebla i El Montiju

La baxá es suavi -ya una ves la subí cona becicleta ai ya unus añinus, peru con el matahogazu las barreras no arreparé en ná. El sol caía ligeru por frenti, diendu a somatraspón ata que los cerrus lo incultarun del tó. La umidá la sombría empapujava los regonis de folasterus ucalitus, an pie de la repelusa dun canal ora sin agua. Delantri se destendían las tierras de Pedro Franco, una praná con cudiaus bancalis charpicá de casillas i chalés.

Casa pa guardal el canal

Me llama l'atención la casa'l guarda, de la hechura típica la colonización, cona chiminea larga i los arcus de la fachá. Passa un cochi con genti nueva que grita "hai" i s'espareci enantis de poel canteal-mi sigún hagu la retrataúra.

Los Cerros de Lobón

Crein que en esta parti, a los pies d'estus cerrus es andi estava la villa ena que se refujó la mártiri Santa Olalla... qué sabemus allá! Comoná que apesquizara un poquinu más, pos genti leía mos escrivió que, velallí, avían restus. Diva cona cabeça gacha por si víamus qué. Cogiendu una verea, me empingoroché: s'escolumbrava la vega imensa, eterna, namás acutá por estus cerrus i los lombus que son el ropiju d'El Montiju. No era altu aquellu, peru sí pa Guadiana, cuyas aguas conocin aquí el sul namás que por Guaxira: un muru de charnecas, escobas i ucalitus está apescolau.

Hongus ressaltantis en una tocorra

Conos pantalonis enllenus de repegonis i sin desapartal la vista'l suelu, prencipié a vél torruscus i cascajus. No poía sabel si eran despresus d'arriba o era lo que Navarro del Castilla dizía... la custión era que pallí ai una tupa restus de edificación, enque la fusca no dexa vél demaseás conseñas.

Pieras de molinu

Sí que hallé a renti'l canal dos pieras grandis, siendu una d'ellas, velaquí, dun molinu o lagal, cerca dondi antañu encontrarun cerámicas romanas i ibéricas. Las pieras, incultas pol matorragi, están jubileás i aburrías: otra muestra delas muchas pieças museu que tenían d'estal adornandu ayuntamientus, casas de coltura o praças o en qualquiera otru lau mejol que aí.

Piera grandi. Entovía puei destinguil-si pondi diva cogía

Ogañu se vei más estoria tirá a l'orilla dun bancal o enxalmá pola fusca que en un libru testu. Mos tendremus que enseñal a leel las conseñas de los antiguus, ya que no mos aprendierun ena escuela.

No hay comentarios: