martes, octubre 11, 2011

Villa de Torre Águila

Andi la leyenda dis que s'encontrarun una muñeca que era la Virgin de Barbañu está unu de los conjuntus arqueológicus mas emportantis de Estremaúra: la Villa de Torre Águila.

Dende hazi muchu tiempu dizin al sitiu los vezinus de La Puebla i Montiju Los Pareones, topónimu que asseñala mu raspafilón lo que por baxu ai. Hazin unus añus, en 1984, aparecierun muchu restus romanus ena parti de Los Pareones, pero aquellu queó en jerga: arramplarun con moneas, hevillas, sortijas, vasijas... las pieras i la hallaúra quearun entre xaramagus i fusca por añus. Con parti de las termas escavás i hechus los pranus, siguió el sitiu aburríu, sin endicaol ni conocimientu de naidi de lo que allí avía. Hazi ná se pusun a arrecuperal dende la escuela-tallel los restus i el resultau es el acessu al púbricu a unu de los tesorus mas sinificativus de las Vegas Baxas.

Estau de la villa en el añu 2007

El assentamientu se crei que prencipió en el sigru I i estuvu ruqueandu ata la conquista musulmana, quandu escaeció. La villa tuvu que estal pobrá siquiera por unas 700 pressonas que trabajavan pal serviciu la casa i pa cudial de los cultivus de olivus i parras enos tiempus de mas pula. Sin embargu, tamién conoció racheras de abaldonu, pos por cima de los primitivus restus uvun costrucionis destintas, queandu por décadas el sitiu aburríu, namás que comu guangu, armacén o chinanclu.

Hypocaustum

Los restus escavaus ogañu están la huerça d'ellus a la parti derecha la carretera que ajunta la carretera Don Carlo con el puebrinu de Barbañu. Antañu la villa se destendía a dambus i dos laus, pos no avía carretera, i queava al otru lau de Guadiana (el ríu passava enantis mas al norti, diendu ogañu por baju Los Cerrus de Lobón).

Endrentu, los sitius desenterraus mas asseñalaus son las termas, la parti de cultu, la sala octogonal i la estival. Las termas conservan buena parti la estrutura del hypocaustum, andi se caldeava el'agua, bañeras del frigidarium, el apodyterium i el salón central que ajuntava ca unu los bañus con el apodyterium. Amás, tamién premaneci el pozu dandi se sacava el'augua pa la casa i pa las termas, a renti del hypocaustum.

Sala con colunas que ajuntava las dependencias las termas

Hornichi enas termas

Las parelis que se conservan muchas entovía tienin los hornichis andi divan acolocás las estautas o vasijas d'adornu.

Sala estival

El sitiu mas curiosu d'esta villa es una costrución que llaman la sala estival, por sel el quartu mas frescu i andi el amu se arrecogía en el veranu. Conserva la bóveda original -enque con una capina de cimentu-, dos escaleras de acessu i una ventanina, cuyu partilús s'á perdíu. Las escaleras de acessu son dos, una mas en barrera, que es la primera (en el afotu, la de la gocha) i otra tardía de quandu el quartu se gastó comu dispensa. Las parelis estavan forrás de marmu de Portugal, pero dispués, con el otru gastu que le dierun, se abrierun unus buracus enas parelis los laus pa ponel maerus i colgal la chacina o otrus produtus. Entre tolos restus romanus, namás s'án encontrau salas en crassi d'esta en La Lusitania i en el norti d'África.

Sala octogonal

Diendu pal peristylum, cerca las alcobas se vei una sala bien rala. Es un quartinu con ochu parelis enas que ain hornijas, unas reondeás i otras quairás, angunas con peanas de granitu. Era una especii de despachu del amu con entral acutau.

Parti de salienti

Ena parti de salienti sigui el peristylum i el sitiu del cimenteriu la villa. Entovía quea muchu terrenu pa escaval en essi lau.

Higuera, junta la parti de cultu

Una costrución con pranta en crus latina hecha entre el sigru II i III era el sitiu de cultu de los abitantis la villa. Ena cabecera ai un hypocaustum chiquinu, de má que tamién se gastaría pa sala de iviernu, pos caldeava tola abitación. En tiempus visigodus tuvu que gastal-si d'ermita.


Grandol de la ermita

Almaçara conos lagaris detrás

Pola parti de ponienti, al sul de la villa, tras de las termas, se hallan los armacenis, dispensas i lagal. Pola hechura, aquí se molía azituna i se hazía vinu. Tien angunus lagaris i en el llanu se conserva el sistema de canalización del líquiu. Tamién tienin presenteras angunas pieras de molel.

Esti es unu de los patrimoñus que s'án conservau enas Vegas Baxas, por baju tierra i seguramenti d'augua en angunas quinzenas, i que se está rescatandu. Es un primel passu pa la recuperación de la erencia material que mos quearun romanus i visigodus, cuyus restus albondan, pero no están aprovechaus pal vesitanti. Es prejisu un cambiu de mentalidá pa dessegil la recuperación d'esta parti de la nuestra estoria, paque algu que llaman Los Pareones prencipii a recordal-si comu lo que hue, una villa.

No hay comentarios: