miércoles, agosto 09, 2017

Los andilis del'agua: La Barca

Entre los términus de Guaxira i Val-dela-Calçá, muchu antis de que hueran Guaxira i Val-dela-Calçá, estava el embarcaeru. Con una barca ancha de tabla s'unía el caminu La Ordin comu una garapa entre las aguas duna Guadiana que no conocía presas i puertas. 

Llorón dandu sombra las choscas i las bolsas de raferías
 Delo que puea recordal essi passau barqueru, cenzillu, simpli, de dos caminus que se unin pol'agua, quasi que ná quea.
Caminu La Ordin abaxandu pala Barca
 Apenas quea la direción, el endilgu delos dos caminus alas dos orillas, abaxandu ala corrienti amarrón entre xaramagus i ucalitus.
Espigón de rollus en el embarcaeru
 En el hondón, un espigón de rollu, una plataforma con una argolla se vein quandu Guadiana está baxa, junta los tubus duna casilla que no sabemus si enfuncionan pa algu.
Plataforma, camaloti i tubus
 Agora el camaloti lo puei tó, lo tapa tó i lo embuyi, engutiendu-lu embaxu delas sus ojas mu verdis i delas sus lindas froris. Vinu pa queal-si.
Argolla dela maroma
 Arriba ena barranca, un hitu, un almajanu delos antiguus de cantería está tirau ala espera de que lo acoloquin en el sitiu que perteneci. Comu otra bassura más. Enque enos retratus no salin, ai una puerta de frigoríficu, çapatus, bolsus con sabi-dios-qué endrentu, latas i latas i más latas i bolsas de patatas i çaragallas de toa crassi que pescaoris i quien no son pescaoris quean allí tan campantimenti.
Hitu entre los xaramagus secus
 Ni la bassura, ni los ucalitus ni el camaloti son de Guadiana: sin embargu es agora lo que más tien. Toas essas cosas i más puein ver-si ena Barca, dela que namás quea la horma entre los desechus delos ombris.
Pelitasqui dela Barca ai unus añus

domingo, mayo 01, 2016

Los andilis del'agua: La Bonilla

Çamargullendu-mus ena toponimia chica delas Vegas Baxas, encotramus unu d'estus topónimus de regustu romanci delos que escassean ca ves más por hallal-si apeninas enos librus d'estoria i ena lengua delos más viejus del lugal: La Bonilla

Vega del Trampín
 Esti manantíu está velallí ena parti que dizin del Trampín, un regatinu que corri entre los cerrus a salienti de Lobón, junta el Montezillu i la moderna autovía, más acá delos Concejilis.
Parralis i olivaris del Trampín
 El propiu Trampín da fé dela antigüedá dela toponimia del lugal, cona terminación romanci -ín, comparanti al vezinu Lantrín, i hiziendu referencia alos manatíus i chabarconis que en estremeñu tien la raís tramp|.
El caminu'l Caracol
 Ogañu es un veregel de parras, olivus i uertus cercaus pol caminu barrerúu del Caracol, nombri essi que lleva por causa delas retortuñas que has en subiendu entre las barrancas delos cerrus.
Lobón dendi el miraol del caminu'l Caracol

Vegetación del Trampín
 En subiendu está en una revuelta, junta una puentina de mampostería moderna, la huenti que dizin los lobonerus dela Bonilla. El topónimu es antiguu, peru no tengu datus tocantis ni ala su obra ni dendi quándu reza con essi nombri.
Margaritas amarillas

Margaritas delas grandis
 Sigún comprendemus, la palabra "Bonilla" vien polas propiedais del'agua que de pallí mana i quea recogía en essa huenti. Son mu pocas las huentis que se conservan enas Vegas Baxas i, desquitandu angunus topónimus comu El Calienti o El Infiernu, mu pocas mientan delas qualidais del'agua.
Rincón dela Bonilla
 La huentina está hecha de mampostería de ladrillu. Es mu chiquina, de horma quairá ena basi i tapá por tres laus. Del arranqui dunu d'ellus entendemus que respondi al tipu de huenti cubierta con falsa bóveda, conocía por otras partis d'Estremaúra i que mesmu decumentamus en Ojalvu. Ena paré de huera se vé un rebaxi i angunus cachus de vasija desperdigaus al reol entre la fusca.
Detalli del interiol

Vista dendi arriba
 Junta la huenti ai un par de pilonis pal riegu del uertu que allí ai de hechura más moderna i que polo estrechu del sitiu no da pa hazel alverca comu es tradicional enos uertus delas Vegas Baxas con el sistema de noria. Comu aquí el'agua mana naturalmenti delos propius cerrus (unu delos muchus manaerus i que namás los viejus del lugal se recuerdan) no precisa de noria. Enque no descartamus que uviera en su tiempu mecanismus comu la zanca-la-burra pa regal dendi los regatus.
Huenti i pilonis
En destintas vesitas que ei hechu al lugal, en iviernu, primavera i veranu siempri ei vistu agua allí i bastanti vegetación. El recuéncanu ala sombría i la contina umedá i frescura que allí se nota has que sea un sitiu agradabli en qualquiera tiempu del añu. Los andarinis i ciclistas que por allí passin no s'olvíin d'esti tesorinu escondíu de Lobón que, comu digu, es una delas pocas muestras vivas que entovía conservamus de huenti tradicional. En esti recantu que se escapó ala motilación del Plan Badajoz se respiran los airis dela primitiva vega de uertus i respetu pol'agua.

domingo, abril 10, 2016

Las froris bravías de Guadiana

Enque pareça mentira, entovía quea mucha dela antigua diversidá botánica en Guadiana. Enque las curas delas senaras de frutalis i otrus regueríus i la puesta desmandá d'ucalitus i chopus çalearun la vegetación provincia dela ribera, la simienti delas prantas i el tiempu aparenti son escapás de hazel que enverneçan. Susprendi vel entovía escobas i enzinas enas barrancas, gamonitalis floríus enos cibrantus, atarfalis que relumbran alo largu. 

La reposición delos rosalis bravíus hue un atinu, enque vel tantu chopu i pinu (por baxu se vei un retratu) quita d'aprecial los lloronis, las arcacias o los alisus. Velaquí el reportagi duna tardi de bici, abriendu bien los ojus a essas florinas bravías que crecin sin que naidi las aprecii enas sombrías de Guadiana, polas vereas i junta los caminus.
Xaramagu amarillu junta Guadiana

Gamonitus ena Rueda

Liriu enas barrancas de Guadiana

Ucalitus del badén de Talavera

Froris del xaramagu

Margarita amarilla con un bichinu

La frol dela malva

Primeras ojas delas arcacias

Capullinu dela cerrajina

Inflorescencias dun pinu nuevu

Inflorescencias del atarfi

Inflorescencias delos alisus

Frol del rosal bravíu abierta con un restu de frutu (reventabueyis) detrás

Frol del rosal bravíu a abril-si

Escoba amarilla

Cardu abiertu con varias alcachofas

Inflorescencias delas enzinas

Ramilleti dun cerezu

lunes, marzo 21, 2016

La Charca las Yeguas i el Muru

Otra tardi dispués duna mañana metía en agua da de resultau campus alagaus i cielus retratablis entre las floris. Esti golpi recorrí el caminu'l Muru pola Charca las Yeguas, el Puente Roto i el Muru alantri con xaramagalis da metru i gamonitalis entre las higueras i las enzinas.